بسم الله الرحمن الرحيم
تخصص الكيمياء مو غريب أو غير معروف عشان اتكلم عنه في موضوع منفصل لكن بتكلم عنه فقط لهدف طلبة المدارس اللي يفكروا فيه كتخصص جامعي، أو لطالبات التحضيري ..
بدايةً الكيمياء تدرس المادة و أي شيء يمكنك أن تشعر به وتلمسه يعتبر ماده. اذاً بعبارة ثانية : الكيمياء تدرس كل شيء في الحياة كيف صار D: -مبالغة شوي- بس فعلاً سواءً بالفيزياء أو بالاحياء او بالطب يعتمدون اعتماد اولي على الكيمياء! وعشان كذا اسمه العلم المركزي.
بالنسبة لجامعة الاميرة نورة..
خطة الكيمياء عندهم تحصلوها هنا
للأسف هذي خطة قديمة قبل ما يصير فيه تحضيري، شوفوا من صفحة ١٦ .. نفس المواد لكن بترتيب مختلف
المهم انه من بعد المستوى السادس تُخير الطالبة بين مسارين اما الكيمياء التطبيقية أو الكيمياء البحتة
ايش الفرق بينهم؟
انا سألت بنات ودكاترة كثير يقولون لي مافيه فرق الا ب ٣ مواد موجودة عن البحته ماهي موجودة في التطبيقي والتطبيقي عندهم مادة مو موجودة عند البحته... وفي الحقيقة لما دققت بالخطة كويس،لا! فيه فرق كبير بينهم في طبيعة المواد اللي يدرسونها
أول شيء التطبيقي دراستهم أغلبها في المعامل مو في كلاس.
ثانياً في المواد الاختيارية بالمستوى الثامن مو زي بعض أبدا
ثالثا في المجال الوظيفي طبعاً مو نفس الشيء، التطبيقي عادةً يكون في المصانع او المختبرات او هيئة البحوث العلمية أو هيئة الغذاء والدواء وايضا سابك وارامكو ..والبحتة مجالهم يقتصر على التدريس فقط
لكن لأمان المصداقية هيئة الغذاء والدواء لسه ما فتحوا توظيف النساء بس يعشمونهم يقولون بيفتحون قريب..
وممكن في حالات مشروطة يتوسع المجال الوظيفي ، تكمل دراسه في الطب او الصيدلة او حتى للبنت اللي درست تطبيقي تاخذ سنة تربوي وتصير تقدر تشتغل في مجال التدريس.
صراحة الموضوع مقعد في استكشاف الفروق بينها وايش الافضل .
في النهاية، لازم نوقن ان الوظيفة في أي تخصص ماهي الا رزق من ربي، لا تفكرون كثير في المجال الوظيفي واتبّعوا اللي تحبونه وبس .
أنا بحاول أجمع معلومات أكثر في كل الجامعات السعودية ورح أستمر بتحديث الموضوع مع كل معلومة جديدة أعرفها ، والله وليُّ التوفيق
